金像獎2024丨洪金寶獲頒終身成就獎實至名歸　曾智華揭洪金寶高麗虹觸電契機

昨天標題《唔服！》，引起大量和應，真係人同此心！

主因我肥碌與身邊的堅貞港產片粉絲，對電影金像獎俾《金手指》橫掃六個大獎，感到極度唔服！

絕對只針對事而非針對人！

講完唔服今日講「服」。

簡單，當晚有兩次全場起立鼓掌致敬，全部自發，呢下，就真係--服晒嘞！

第一次，大會頒專業精神獎俾「萍姐」唐萍，佢對電影圈有幾大貢獻，外邊人根本唔知，因未聽過，但圈內，幾十年來，人人心領。故此，佢一出場，全部在座者彈起鼓掌致敬。

第二幕，就是頒發終身成就獎俾洪金寶之時，個個起立大力鼓掌，因全無異議，只由衷佩服，實至名歸也。

洪金寶在台上非常得體，分別感謝前任及現任太太，在台下的高麗虹甜到漏，笑得燦爛。

小弟看在眼裏，也會心微笑，因佢兩位結緣，由我而起也。

話說一九八六年，小弟被派主持香港電台周日雜誌節目《龍鳳俏冤家》，度拍檔時，諗到高麗虹，因若請到佢，肯定有話題性！第一，高小姐乃香港小姐；第二，人人以為佢鬼鬼哋唔識講流利廣東話。

點知，開聲便知有沒有，非常掂！

每次節目為增加吸引性，都會訪問一位巨星，某次，請到洪金寶。

洪大哥一坐低，我肥碌已覺空氣中出現一種電波，正是洪金寶與高麗虹互相觸電也。

很快，「大哥大」已開戲捧高小姐做主角，然後，先情侶後夫婦，就此近40年喇！

HKET App已全面升級，TOPick為大家推出一系列親子、健康、娛樂、港聞及休閒生活資訊及影片。立即下載︰https://onelink.to/f92q4m

追蹤TOPick Whatsapp頻道睇最新資訊︰http://tinyurl.com/3dtnw8f5